समता पंधरवड्यानिमित्त विशेष जात पडताळणी मोहिम
अकोला, दि. २ : महामानव भारतरत्न डॉ. बाबासाहेब आंबेडकर यांच्या १३३व्या जयंतीनिमित्त जिल्ह्यात समता पंधरवडा साजरा करण्यात येत आहे. त्यानुसार जिल्हा जात प्रमाणपत्र पडताळणी समितीतर्फे विशेष जात प्रमाणपत्र पडताळणी मोहिम हाती घेण्यात आली आहे.
मागासवर्गीय विद्यार्थ्यांना आणि इतर अर्जदारांना जात वैधता प्रमाणपत्र त्वरित उपलब्ध करून देणे हा मोहिमेचा उद्देश आहे, राज्यातील इयत्ता ११वी व १२वी विज्ञान शाखेतील सन २०२५-२६ मधील प्रवेशित सर्व मागासवर्गीय विद्यार्थ्यांना प्राधान्याने प्रमाणपत्रे उपलब्ध करून दिली जातील. उच्च शिक्षण तसेच व्यावसायिक अभ्यासक्रमांमध्ये प्रवेश घेण्यासाठी जात वैधता प्रमाणपत्र अनिवार्य असल्याने, कोणत्याही विद्यार्थ्याला या प्रक्रियेत अडथळा येऊ नये म्हणून विशेष शिबिराचे आयोजन करण्यात आले आहे.
सामाईक परीक्षा २०२५ चा निकाल जाहीर झाल्यानंतर ज्या अर्जदारांनी अद्याप जात वैधता प्रमाणपत्रासाठी अर्ज सादर केला नाही, त्यांच्यासाठी विशेष खिडकीची सुविधा उपलब्ध करून देण्यात आली आहे. तसेच, त्रुटीमुळे प्रमाणपत्र रखडलेल्या अर्जदारांसाठी विशेष त्रुटी निवारण शिबीर ८ एप्रिल रोजी समिती कार्यालयात आयोजित करण्यात आले आहे.
विद्यार्थ्यांना या प्रक्रियेची माहिती वेळेवर मिळावी म्हणून इमेल, एसएमएस तसेच अधिकृत पत्रांच्या माध्यमातून तसेच समतादूतांमार्फत दूरध्वनीद्वारे संपर्क साधण्यात येत आहे. या विशेष मोहिमेचा लाभ घेण्याचे आवाहन समितीचे अध्यक्ष जितेंद्र काकुस्ते, उपायुक्त अमोल यावलीकर व संशोधन अधिकारी तथा सदस्य सचिव मनोज मेरत यांनी केले आहे.